Bagaheng Pabigat sa Tuwid na Daan

Sa mga alipores po ni PNoy mga kabalat ko, isa sa nakita kong “kapalmuks” at “kapit-tuko” sa posisyon ay ang sekretaryo ng Agrikultura na si Ginoong Proceso Alcala. Ang totoo, kapag ini-interview po ito sa radio o telebisyon, hindi ninyo maiiwasang kumulo ang dugo. Ang dahilan, he is a consistent liar kung saan, ang akala niya ay meron pa siyang mapaniniwala sa kanyang mga kasinungalingan. 

Marami na pong isyu na ibinabato sa kanya mga kabalat ko, pero dedma lang siya at mahilig mangatwiran ng palso at wala sa lugar. Tahasan pong ginagago niya ang mga tao na tila walang alam sa nangyayari sa kanyang departamento at sa mga ahensiyang kontrolado niya gaya ng NFA. Kung may datos mang ipinakikita ang taong ito, kabaligtaran po sa nangyayari.

Pansinin po ninyo mga kabalat ko. Ang sabi ng Sekretaryong ito, self-sufficient na raw po tayo sa bigas, and yet, ano po ang nangyari? Kabaliktaran. Katulad din po siya ng kanyang alipores na nakaupo sa NFA na di-umano’y isa daw pong American Citizen na sobra-sobra po ang supply at hindi kakapusin ang bigas, pero ano ang resulta. Labis na pagsirit pataas ng presyo ng bigas. Ang kanilang depensa, hoarding. Ano ang ginagawa nila, nagtutulog sa pansitan kaya namamayagpag ang mga hoarders ng bigas kung merom man. Katuwiran ni Ginoong Alcala, meron daw silang mga kinasuhan na, pero bakit walang nababalita na nademanda at na-prosecute? Siya lang po kasi ang nagsasabi at hindi ito nakikita o nalalaman ng mamamayan.

Nang magmahal ang bigas, bababa na raw po ang presyo ng bigas in a weeks or a month. Iyon ang sabi niya! Pero hindi po ganito  ang nakikita ng mga ordinaryong namimili araw-araw ng bigas. Nananatili pong  mataas ang presyo ng bigas at iyong dating halaga nito noong July, ay hindi na po nabalik sa dati. Nag-level up na po ito kung saan 35 pesos na ang piankamababa at pinaka-pangit na klase ng bigas. Aba’y kung hindi “ungas” ang nasa departamentong ito, ang bigas na “butil ng buhay” pa ang tila gustong paglaruan ang presyo gayong buhay at kamatayan sa pagkakagutom ng mga sobra ng naghihirap na mamamayan ang magiging resulta nito. Gusto nilang iparis sa ito presyo ng langis na taas at baba. 

Ang sekretaryong ito sa sarili at malaya kong pananaw,  pagtaya at pag-aaral  sa sinasabi ng isang tao ay isang  “congenital liar” sa consistent niyang pagsisinungaling at pagtatakip sa tunay na sitwasyon o nangyayari which to me is one of the reason kaya patuloy na bumababa ang popularidad at trust rating ni President PNoy Aquino. Ang pagpapanatili niya at di pagsibak sa puwesto kay Secretary Proseso Alcala. Isang taong sangga-ng sangga sa ipinupukol sa kanya mga batikos at akusasyon, gayong ang kalasag naman niyang ginagamit  ay "butas-butas" na. 

Manalangin po tayo

Panginoon po naming Diyos na makapangyarihan sa lahat. Ikaw po ang tunay na nakababatid sa nilalaman ng puso at kaluluwa ng isang tao. Meron pong isang tao sa Kagawaran ng Agrikultura na patuloy na kinakanlong ng kanyang “Amo”. Isang taong mahilig maglubid ng kasinungalingan at ginawawang tanga ang mga mamamayan. Sana po, ibagsak mo na ang “tabak ni Damokles” sa taong ito upang maputol na rin ang mga kasinungalingang nagmumula sa kanyang bibig.  Sana rin po, mamulat na ang isipan ng kanyang Amo, na sa halip na makatulong sa kanya ang kanyang alipores na inaalagaan, ito pa ang humihila sa kanya sa pagka-disgusto ng mga mamamayan. Sa halip na maging asset niya sa isang tuwid na daan, nagiging  bagaheng pabigat pa po ito sa hinihilang karito ni PNoy. Sana po, kung sakaling mapapakinggan ng kanyang Amo ang aming panalangin, ang ipalit po sa kanya ay iyong tunay na maglilingkod sa mga mamamayan ng buong katapatan. Isang taong kapag sinabing magiging self-sufficient na ang Pilipinas sa bigas, iyon po ang totoo. Kapag sinabi pong bababa na ang halaga ng butil ng buhay na bigas, iyon nga po an gaming makikita sa mga pamilihan. Isang taong kapag binato ng batikos, hindi po maglulubid ng kasinungalingan, sa halip ay may tapang at kakayahang aminin ang totoo sa mga mamamayan sa tunay na sitwasyon. Isa pong taong, may delikadesa at handang magbitiw sa tungkulin kapag nawalan na ng tiwala sa kanya ang mga mamamayan.

Lubos po kaming umaasa Panginoon naming Diyos na pinakinggan mo na po ang aming panalangin.

Amen