Ang Langaw at ang Epal

Ilang taon na po mula ngayon, nang maganap ang tinatawag na Luneta tragedy, mga kabalat ko.  Kung pagbabalikang tanaw, ilang Hongkong nationals at turista ang nasawi dahil sa pagwawala ng isang problemado at dating police officer na nang-hostage sa kanila. Ito po ay isinisi kay PNoy na halos kauupo lang noon sa puwesto at sa dating Mayor ng Maynila na si Alfredo Lim dahil sa pumalpak na pag-handle nila sa sitwasyon at operation sa hostage crisis. Ito po ay naungkat lamang uli nang umepal at komprontahin at bastusin si President Noynoy ng mga Hongkong correspondents sa Indonensia nang dumalo siya sa  APEC. Humihirit po ang mga ito sa kanya ng apology.  Ngayon ay muling nabuhay ang isyu sa gitna ng kumukulong PDAF at DAP Scam.

Hati ang mga mamamayang Pilipino sa isyu ng paghingi ng apology ni President PNoy Aquino sa Hongkong. Sa pananaw ng iba, bakit hindi na lang daw pagbigyan ni PNoy, para matapos na ang lahat. Ganoon man, una ng nanindigan si PNoy na hindi siya hihingi ng “Sorry”. Ang dahilan, hindi raw kasalanan ng buong sambayanang Pilipino ang ginawang aksiyon ng iisang Pilipino na nagwala at  nagresulta ng kamatayan sa ilang Hongkong National sa Luneta hostage crisis. 

Alam po ninyo mga kabalat ko, iba ang naaamoy ko sa isyung ito. Maaaring ginagamit lamang ito ng ilang Hongkong officials, particularly those who are in politics para maging mabango sila sa paningin ng kanilang sariling mamamayan. Sa Pilipinas naman, kataka-taka ang biglang pag-epal at pagbuhay ng sorry issue  ng Lungsod ng Maynila. Tila sinamantala nila ito para nakisakay din sa agos. Ang bagong Mayor ngayon ng Maynila na si Erap Estrada ang umepal para mag-sorry. Ito ba ay para  bumango siya sa paningin ng mga Pilipino?  Mailayo sa kanya ang isyu na kinasasangkutan ng kanyang anak na Senador na si Jinggoy Estrada na kinasuhan din ng Pandarambong bilang like father, like son?

Kung karapat-dapat  mag-apology, wala po akong nakikitang masama dito mga kabalat ko. Pero  hindi ganito kadali  ang mag-sorry lalo na  kung may kasama na itong banta ng sanctions against us,  mula sa mga nanghihingi nito. Na tila baga may bahid na ng “panduduro at pambu-bully”.  Ang Pangulo ng bansa na nagre-represent ng ating pagiging Pilipino, bilang isang lahi. Dapat munang timbanging mabuti ang lahat. Sa lider po natin makikita kung sino tayo sa buong mundo. Kung tayo ba ay matikas o luno. Kung tayo ay may pride o wala. Hindi komo marami  tayong OFW na nagta-trabaho sa Hongkong ay ganoon na lang kung tayo’y takutin. So, kung ang paghingi ng apology ay dahil lamang sa “kapritso” ng ilang correspondents at pulitiko sa Hongkong na gustong sakyan ang issue para bumango sa paningin kanilang mga kalahi,  hindi po pabor ang inyong kabalat dito. 

Tungkol naman kay Erap at sa kanyang sorry, in behalf of his nemesis in the last Mayoralty election, Mayor Alfredo Lim, it’s his choice. May nasisilip man akong “hidden agenda” sa layunin niyang ito, wala po tayong magagawa. Siya ang inihalal ng mga nakararaming residente ng Maynila kaya kung ano man ang inaakala niyang makabubuti sa imahe niya at ng kanyang lungsod, diskarte na niya ito. Anyway, hindi naman siya ang Presidente ng bansa, kaya hindi siya ang nagre-represent ng buong Pilipinas. Meron din naman tayong “pride” as a Nation. Maipakitang, kaya rin naman nating tumindig at huwag yumuko sa pambubully ng isang "langaw"  na nakatungtong sa likod ng kanyang higante at mapang-bully rin niyang nanay’.

Manalangin po tayo

Panginoon po naming Diyos, muli po kaming tumatawag at naninikluhod sa iyo. Marami pa pong problemang kinakaharap ang aming bansa. Hindi pa rin po ganap na nakaaahon ang ilan naming mga kababayan na nasalanta ng kalamidad. Marami pa rin pong isyu na patuloy na nakaka-apekto sa aming mga mamamayan. Sana po ay  matapos na ang usaping may kinalaman sa naganap na Luneta tragedy. Tahimik at matagal nang nakahimlay sa iyong kandungan ang mga biktima ng trahedya. Ganoon man, ito ay patuloy na binabalikan ng mga taong buhay at ginagawang multo sa administrayon ni PNoy. Ito rin po ay sinasakyan ng mga pulitikong nagnanais “umepal” para sila matampok at bumango sa kanilang mga kababayan. Hindi lang po ang relasyon ng Hongkong at Pilipinas ang apektado dito. Ganoon din po ang libo-libong OFW. Sana po, ikaw na ang kapangyarihang gumalaw dito upang matapos na ang lahat ng sigalot tungkol dito. Payapain mo po nawa ang kalooban ng mga Hongkong national na patuloy na nag-aalab ang damdamin hinggil dito. Bigyan mo na rin po sana ng kapayapaan ang isip at kalooban ng mga kaanak ng mga nabiktima sa trahedya at ipasumpong ang ganap na pagpapatawad sa kanilang mga puso. Sa mga pulitiko namang nakikisakay at umeepal sa isyu, sa Hongkong at maging dito sa PIlipinas, nawa’y ipaunawa mo sa kanila na hindi na sila dapat makisawsaw dito. Na ito ay dapat nang matapos na katulad  ng isang  tiklop na aklat upang, maka-move on na ang lahat. 

 

Nawa’y nakaabot sa iyo ang aming panalanging ito at mabigyan mo ng katugunan mahal naming Diyos na makapangyarihan sa lahat.

Amen