Patay na Langaw sa Administrasyong PNoy

Proseso Alcala

Secretary of Agriculture

Sa mga naging cabinet secretary ni President  Benigno Simeon Aquino mga kabalat ko, tila  itong si Secretary Proseso Alcala ng Department of Agriculture ang laging nasasangkot sa controversy. Bukod dito, kung hindi ako nagkakamali, nasampahan na rin siya ng plunder case at meron pang  muling naka-amba o inihahandang kasong ganito  laban sa kanya mula sa isang abugado. Siguro ay  panahon na para sa Malakanyang, particularly si P-Noy na siya na mismo ang kumilos para suriiin, bulatlatin, halukayin, at i-dissect   ang tunay na pagkatao nitong si Alcala. 

Meron nga po tayong mababasang  kawikaan sa Bibliya na “ang isang patay na langaw ay sapat na upang mapabaho nito ang isang bote ng pabango”. Kaugnay nito, gaano man katuwid ang daan na ipinangangalandakan ni P-Noy sa kanyang administrasyon, kung meron namang  nagpapabaho sa kanyang panunungkulan, wala ring saysay ang kanyang ginagawang paglilinis o pagpapabango sa ilalim ng kanyang pamamahala.

Ako mga kabalat ko ay isa lamang sa mga mamamayang tahimik na nag-aanalisa sa mga nangyayaring kaganapan sa pamamahala ni Pnoy, at nakalulungkot na makitang tila hindi siya sensitbo sa ganitong mga akusasyon laban sa kanyang mga tauhan. May kasabihan nga na,  “kung walang apoy, walang uusok”  and yet, nananatili siyang nakahalukipkip ang kamay habang inuulan ng batikos, akusasyon at paratang ang isa niyang cabinet secretary.

Sa totoo lang mga kabalat ko, mula nang magmahal ang bigas sa merkado, na hanggang ngayon ay “mahal pa rin”, consistent kong pinag-aaralan ang mga binibitiwang salita ni Secretary Alcala sa mga interview ng media sa kanya at marami po akong nakikitang loopholes o "butas" sa kanyang mga nagiging pahayag.  Kung hindi man inconsistent  o  salu-salungat, pawang mga lip service lang po ang ibinubuka ng kanyang bibig at narito po ang isa sa paborito niyang linya. “Sige po at ipado-double check natin ‘yan”, kapag natatanong sa nangyayaring katiwalian sa kanyang tanggapan o may issue na hindi niya masagot ng deretsahan. Meron po ba kayong narinig na resulta sa “double check” na sinasabi niya? Wala po. Siya rin po ang nagsabing magiging self-sufficient na tayo sa bigas, pero nagkatotoo po ba? Marami po siyang idinadahilan, kapag  may problema tayo sa igas, ang bagyo, kalamidad, etc, etc, pero at the end of the day, iisa lang po ang nakikita ko, lagi pong "PALPAK" ang kanyang mga pinagsasasabi at kayang-kayang bilugin ang ulo ni PNoy.

.

Gaya ng nauna ko ng naging komentaryo  and I repeat this again, and again. Sa sarili ko pong pananaw ang taong katulad niya ay  sinungaling. LIAR. Mahilig pong  maglubid ng buhangin and with the current issues na ibinabato sa kanya  tungkol sa rice smuggling, Quezon Mafia, etc, etc, malamang na mas marami na naman po siyang buhangin na gagawing lubid. Ganon man, hindi po mapapabango ni Secretary Alcala ang administrasyon ni PNoy sa kanyang mga nilulubid na buhangin.  

At the end of the day, (paborito po itong linya ni Secretary Alcala na hiniram ko) kung ang itatanong po ninyo mga kabalat ko ay may pag-asa pang tumaas ang  trust rating ni PNoy bago siya manaog sa pagka-presidente? Malamang na hindi na po. Bakit  po? Dahil may nakikita akong “patay na langaw” na nagpapabaho sa imahe ng administrayong PNoy.  Si Secretary Proseso Alcala

.

Manalangin Po Tayo

Panginoon po naming Diyos, muli kaming lumalapit sa iyo. Maraming kalamidad po  kaming pinagdaanan noong nakaraang taon. Mga natural at man made calamities na naka-epekto sa buhay ng marami naming kababayan. Umaasa po kami na ikaw din ang tutulong sa bumangon sa mga bayang nasalanta. Tumindig mula sa pagkakalumok ang mga taong nawindang ang mga buhay at kabuhayan. Sa kabila po nito, marami pa rin po na nanunungkulan sa pamahalaan na sa halip dumamay, sinasamantala po ang pagkakataon para sila kumita at magkamal ng salapi. Mga ganid na hindi po yata nakakakilala ng tunay na pagmamalasakit sa kapwa.

Sa administrayon pong ito ay marami nang pasaning dinaranas ang mga mamamayan. Nasabi ko na nga po na “we need a hero” para isalba kami sa patong-patong na paghihirap. Pero sa halip na hero, mga taong sinungaling at mahilig lang mag-magaling ang aming nasusumpungan. Ang bigas po ay butil ng buhay, pero hindi po ito nakikita ng mga taong nasa palad nila ang sikmura ng mga mamamayang nagugtom. Sa halip pong ibaba, pinaglalaruan po nila ang presyo nito para mapataas pa ang halaga. Sila na kasabwat ng mga nagmo-monopolyo nito, nag-i-smuggle upang magkamal ng salapi para sa sariling kapakinabangan. At the end of the day, ang mamamayan po ang laging talo at nalalagay sa higit pang panghihirap.

Umaasa po kami o, dakila naming  Diyos na ibabagsak mo  ang tabak ni  Damocles sa mga taong ito. Sila na nagpapabaho sa administrasyong tuwid  “daw”  na daan pero kanilang pilit na inililiko sa daang baluktot. Ikaw na po Panginoon ang gumawa ng paraan na maglalantad sa tunay na pagkatao nila upang mapagbayad sila sa kanilang ginagawang katiwalian. 

Nawa ay narinig mo na ang aming panalangin sa iyo o Diyos naming makapangyarihan sa lahat. Hinihiling po namin ito sa pangalan ng iyong anak at aming tagapagligtas na si Hesukristo. 

AMEN